لاہور:صوبائی دارالحکومت کے علاقے ڈی ایچ اے فیز ٹو میں موٹر سائیکل کی پٹرول ٹینکی پھٹنے کے باعث حادثہ پیش آیا، جس کے نتیجے میں 8 افراد جھلس کر متاثر ہوئے۔

پولیس کے مطابق واقعے کے بعد متاثرہ افراد کو فوری طور پر طبی امداد کیلئے جناح ہسپتال کی سرجیکل ایمرجنسی منتقل کیا گیا، جھلسنے والے افراد میں عامر، اسد شہباز، امتیاز، حمزہ جاوید، سمیع، ظہیر، دانش اکرم اور اسد اللہ دتہ شامل ہیں۔

حادثے کی اطلاع ملتے ہی متعلقہ پولیس موقع پر پہنچ گئی اور واقعے سے متعلق ابتدائی معلومات اکٹھی کیں، موٹر سائیکل کی پٹرول ٹینکی کس وجہ سے پھٹی، اس حوالے سے مزید تحقیقات جاری ہیں۔

ہسپتال انتظامیہ کے مطابق تمام متاثرین کی حالت تسلی بخش ہے اور انہیں علاج فراہم کیا جا رہا ہے۔

The post لاہور: موٹر سائیکل کی پٹرول ٹینکی پھٹنے سے 8 افراد جھلس گئے appeared first on .

اسلام آباد: یوم آزادی 2026ء کے موقع پر مختلف شعبوں میں نمایاں خدمات اور بہادری کے اعتراف میں 355 شخصیات کیلئے سول ایوارڈز کی منظوری دے دی گئی۔

صدر مملکت نے سائنس کے شعبے میں 6 شخصیات کیلئے سول ایوارڈز کی منظوری دی، شاہد محمود کیلئے ہلال امتیاز، پروفیسر ڈاکٹر ظفر الیاس اور پروفیسر ڈاکٹر مدثر اسرار کیلئے ستارہ امتیاز جبکہ ڈاکٹر ساجد حسین، ڈاکٹر انیلا ضمیر جعفری اور ڈاکٹر عروج کیلئے تمغہ امتیاز کی منظوری دی گئی۔

تعلیم کے شعبے میں لیفٹیننٹ جنرل ریٹائرڈ معظم اعجاز کیلئے ہلال امتیاز جبکہ ڈاکٹر محمد رضا، ڈاکٹر خالد مسعود گوندل، ڈاکٹر راشد امجد اور ڈاکٹر ظفر اقبال قادر کیلئے ستارہ امتیاز کی منظوری دی گئی۔

نائب وزیراعظم اسحاق ڈار، وزیر داخلہ محسن نقوی، وزیر خزانہ محمد اورنگزیب، احد چیمہ اور بلال اظہر کیانی کیلئے نشان امتیاز دینے کی منظوری دی گئی۔

ڈی جی آئی بی فواد اسداللہ، اٹارنی جنرل منصور عثمان اعوان، چیئرمین ایف بی آر راشد محمود لنگڑیال اور سیکرٹری خزانہ امداد اللہ بوسال کیلئے ہلال امتیاز کی منظوری دی گئی، روسی نائب وزیراعظم الیکسی اوورچک کیلئے ہلال پاکستان تجویز کیا گیا۔

طب کے شعبے میں پروفیسر ڈاکٹر فیصل سعود ڈار کیلئے ہلال امتیاز جبکہ پروفیسر ڈاکٹر طاہر شمسی کیلئے بعد از مرگ ستارہ امتیاز کی منظوری دی گئی، پروفیسر ڈاکٹر سید جلال رضا اور ڈاکٹر نعیم صلاح الدین مرحوم کیلئے ستارہ امتیاز کی منظوری دی گئی۔

فنون لطیفہ کے شعبے میں سلطانہ صدیقی کیلئے ہلال امتیاز، بلقیس بانو المعروف نشو بیگم، افتخار احمد ٹھاکر، سید فصیح الدین سہروردی، شاکر حسین، ترنم ناز، سائرہ جوہر پیٹر، عابدہ احسان مرحومہ، راجہ چنگیز سلطان، محمد نعیم طاہر اور بشیر احمد کیلئے ستارہ امتیاز کی منظوری دی گئی۔

ادب کے شعبے میں اسد محمد خان کیلئے نشان امتیاز، اعجاز رحیم اور محمد خورشید الحسن رضوی کیلئے ہلال امتیاز جبکہ محمد شکیل عادل زادہ، پروفیسر بریگیڈیئر ریٹائرڈ وحید الزمان طارق، مقصود حسن جعفری، ریاض الحق طاہر رضوی، ریاض مجید، محمد حفیظ خان، پروفیسر ڈاکٹر محمد سلیم مظہر، ہاشم ندیم اور شاعر سید غلام عباس المعروف محسن نقوی کیلئے ستارہ امتیاز کی منظوری دی گئی۔

کھیل کے شعبے میں عطا محمد کاکڑ اور وسیم اے تائی کیلئے ستارہ امتیاز جبکہ بشیر بھولا، کشمالہ طلعت، نور زمان، سلطان محمد گولڈن، محمد وسیم اور صادق محمد کیلئے تمغہ حسن کارکردگی جبکہ فائقہ ریاض کیلئے تمغہ امتیاز کی منظوری دی گئی۔

سماجی بہبود کے شعبے میں ڈاکٹر مریم ملک اور نایاب علی کیلئے ستارہ امتیاز جبکہ قاری روح اللہ مدنی، حافظ اسد عبید، بشپ سرفراز پیٹر اور سید ریاض حسین کیلئے تمغہ امتیاز کی منظوری دی گئی۔

صحافت کے شعبے میں محمد صالح ظافر اور حاجی نواز رضا کیلئے ستارہ امتیاز جبکہ سید حماد غزنوی اور محمد عامر خان فوٹوگرافر کیلئے تمغہ حسن کارکردگی کی منظوری دی گئی۔ محمد ریاض خان، شعیب احمد، عمار مسعود، ماریہ ذوالفقار، عادل شاہزیب، حماد حسن اور تصور عرفات کیلئے تمغہ امتیاز کی منظوری دی گئی۔

فلاحی خدمات کے شعبے میں محمد شناور خان، عاطف اکرام شیخ، ابیہ اکرم اور ریاض حسین میمن کیلئے تمغہ امتیاز دینے کی منظوری دی گئی۔

انجینئرنگ کے شعبے میں ڈاکٹر محمد صادق اور ڈاکٹر نعیم الحق طارق کیلئے تمغہ امتیاز کی منظوری دی گئی۔

دیگر شعبوں میں پروفیسر ڈاکٹر غزالہ یاسمین، پروفیسر ڈاکٹر ناصر محمود، پروفیسر ڈاکٹر فیصل باری، پروفیسر ڈاکٹر احسان اللہ کاکڑ، ریاض احمد کملانی، صبا فیصل، ڈاکٹر رفیق ملک، سید اظہر آفاق رضوی، قاضی خالد علی، فقیر اللہ، عبدالستار، ڈاکٹر روبی خالد، ڈاکٹر سردار محمد علی ایاز اور یاسمین دادا بھائی سمیت متعدد شخصیات کیلئے تمغہ امتیاز کی منظوری دی گئی۔

مختلف شعبوں سے تعلق رکھنے والی متعدد شخصیات کیلئے تمغہ حسن کارکردگی اور تمغہ امتیاز کی منظوری بھی دی گئی ہے۔

The post یوم آزادی 2026ء: صدر مملکت نے 355 شخصیات کیلئے سول ایوارڈز کی منظوری دے دی appeared first on .

قلعہ احمد آباد (محمد یاسر سے) محلہ پٹرول پمپ میں بارش کا پانی ہفتوں گزرنے کے باوجود گلیوں سے نہ نکالے جانے کے باعث متعدد گھرانوں کو شدید مشکلات کا سامنا ہے اور شہری اپنے ہی گھروں میں محصور ہو کر رہ گئے ہیں۔ انتظامیہ کی عدم توجہی کے باعث اہلِ علاقہ نے اپنی مدد آپ کے تحت دو ٹائروں اور لکڑی کے فٹوں سے دیسی کشتیاں تیار کرلی ہیں، جن کے ذریعے وہ ضروری اشیائے خورونوش کی خریداری کے لیے گھروں سے باہر آنے جانے پر مجبور ہیں۔گلیوں میں مسلسل کھڑا گندا پانی مچھروں کی افزائش اور مختلف موذی بیماریوں کے پھیلاؤ کا باعث بن رہا ہے، جبکہ بچوں، بزرگوں اور خواتین کو آمدورفت میں شدید دشواری کا سامنا ہے۔ شہریوں نے حکومت اور مقامی انتظامیہ سے مطالبہ کیا ہے کہ فوری طور پر ڈی واٹرنگ سیٹ لگا کر بارش کے پانی کی نکاسی یقینی بنائی جائے تاکہ علاقے کے مکینوں کو اذیت ناک صورتحال سے نجات مل سکے اور معمولاتِ زندگی بحال ہوں۔

The post قلعہ احمد آباد: بارش کا پانی ہفتوں سے جمع، شہری گھروں میں محصور appeared first on .

مظفرآباد: آزاد کشمیر انتخابات کے تیسرے مرحلے کیلئے پولنگ آج ہوگی، جس کیلئے تیاریاں مکمل کر لی گئی ہیں، ضلع باغ اور حویلی میں انتخابی سامان پہنچا دیا گیا۔
تیسرے مرحلے میں ضلع باغ کے 3 اور حویلی کے ایک حلقے میں ووٹنگ ہوگی، انتخابی حلقوں میں ایل اے 14، ایل اے 15، ایل اے 16 اور ایل اے 17 شامل ہیں، جہاں 4 لاکھ 60 ہزار سے زائد ووٹرز حق رائے دہی استعمال کریں گے۔

تیسرے مرحلے کے الیکشن میں کل 82 امیدوار میدان میں ہیں، پاکستان مسلم لیگ ن اور پیپلز پارٹی میں کانٹے کا مقابلہ متوقع ہے، پونچھ اور سدھنوتی کے حلقوں میں انتخابات مؤخر کر دیے گئے ہیں۔

آزاد کشمیر الیکشن کے پہلے مرحلے میں میرپور ڈویژن کی 13 میں سے 9 نشستوں پر مسلم لیگ ن کامیاب ہوئی تھی، جبکہ پیپلز پارٹی 4 سیٹوں پر کامیاب ہوئی۔

دوسرے مرحلے میں مظفر آباد ڈویژن کی 9 اور مہاجرین کی 12 نشستوں پر انتخاب ہوا، جن میں سے مسلم لیگ ن 15 اور پیپلز پارٹی 6 نشستوں پر کامیاب قرار پائی۔

The post آزاد کشمیر انتخابات کے تیسرے مرحلے کیلئے پولنگ آج ، تیاریاں مکمل appeared first on .

اسلام آباد: جماعت اسلامی نے 16 اگست سے ملک بھر میں بیک وقت دھرنوں کا اعلان کردیا۔

امیر جماعت اسلامی حافظ نعیم الرحمان کی زیر صدارت دھرنوں کے حوالے سے خصوصی اجلاس ہوا، جس میں نائب امراء لیاقت بلوچ، اسامہ رضی، قائم مقام سیکرٹری جنرل نذیر احمد جنجوعہ سمیت سید وقاص انجم جعفری، اظہر اقبال حسن، رسل خان بابر، جاوید قصوری اور ضیاء الدین انصاری نے شرکت کی۔

خصوصی اجلاس میں تمام صوبہ جات اور بڑے شہروں کے امراء نے ویڈیو لنک کے ذریعے شرکت کی، جس میں یوم آزادی کی تقریبات بھرپور انداز میں منانے کا فیصلہ کیا گیا، جس کے باعث 9 اگست کے بجائے 16 اگست کو دھرنے دینے کا فیصلہ کیا گیا۔

حافظ نعیم الرحمان نے کہا کہ 16 اگست کو چاروں صوبوں میں بیک وقت دھرنے دیا جائے گا، یوم آزادی کا جشن بھی منائیں گے اور 16 اگست کو ملک بھر میں دھرنوں کا آغاز ہو گا۔

ان کا کہنا تھا کہ لاہور میں وزیراعلیٰ ہاؤس کے باہر لاکھوں کارکنوں کے ساتھ دھرنا دیا جائے گا جب کہ خیبرپختونخوا، سندھ اور بلوچستان میں گورنر ہاؤسز کے باہر دھرنے ہوں گے۔

امیر جماعت اسلامی نے کہا کہ حکمرانوں کو جبر اور ظلم بند کرنا ہوگا، دھرنوں کے ذریعے حکمرانوں کو پیچھے ہٹنے پر مجبور کریں گے، گزشتہ روز منظم طریقے سے 510 مقامات پر مظاہرے کیے گئے جو پورے پاکستان کی آواز تھی کہ لیوی ختم اور پٹرول سستا کیا جائے۔

حافظ نعیم الرحمان کا کہنا تھا کہ جماعت اسلامی نے آئی پی پیز کے خلاف آواز اٹھائی تو حکمرانوں سے اپنے مطالبات منوائے۔

دوسری جانب پاکستان، ترکیہ اور سعودی عرب کے دفاعی معاہدے کو خوش آئند قرار دیتے ہوئے حافظ نعیم الرحمان نے کہا کہ اس معاہدے سے دشمنوں پر ہمارا انحصار ختم ہوگا، دفاعی معاہدے میں قطر، بنگلا دیش، ایران، ملائیشیا اور انڈونیشیا کو بھی شامل کیا جائے۔

ان کا مزید کہنا تھا کہ تمام اسلامی ممالک اس معاہدے میں شامل ہوں گے تو ایک مضبوط بلاک تشکیل پائے گا۔

The post جماعت اسلامی کا 16 اگست سے ملک بھر میں بیک وقت دھرنوں کا اعلان appeared first on .

باغ: وزیراعظم کے مشیر برائے سیاسی امور رانا ثناء اللہ نے کہا ہے کہ باغ اور پونچھ ڈویژن کے تیسرے مرحلے میں بھی پارٹی کامیاب ہوگی، آزاد کشمیر میں مسلم لیگ (ن) دو تہائی اکثریت کے ساتھ حکومت بنائے گی۔

باغ میں مسلم لیگ (ن) کے انتخابی جلسے سے خطاب کرتے ہوئے رانا ثناء اللہ نے کہا کہ کشمیری عوام صرف پاکستان سے محبت نہیں کرتے بلکہ پورا پاکستان انہیں اپنا سمجھتا ہے،’ہم پاکستانی ہیں، پاکستان ہمارا ہے‘ کے نعرے کے ساتھ یہ حقیقت بھی سامنے رکھنی چاہیے کہ پاکستان صرف کشمیریوں کا نہیں بلکہ کشمیری بھی پاکستان کے مالک ہیں۔

انہوں نے کہا کہ جو الٹی گنتی گننا چاہتے ہیں، ان کی گنتی سیدھی ہوجائے گی، جوائنٹ ایکشن کمیٹی کےایک فیصد لوگ حالات خراب کرناچاہتے ہیں، کالعدم جوائنٹ ایکشن کمیٹی میں 99فیصد لوگ محب وطن ہیں، جوائنٹ ایکشن کمیٹی کےساتھ بیٹھ کرمسائل حل کریں گے۔

رانا ثناء اللہ کا کہنا تھا کہ اسلام آباد، راولپنڈی، پشاور، فیصل آباد، لاہور اور ملتان سمیت پاکستان کے ہر حصے میں کشمیریوں کو دیگر پاکستانیوں کے برابر حقوق، عزت اور مقام حاصل ہے، کشمیری مختلف شعبوں میں کاروبار اور ملازمتیں کررہے ہیں جبکہ پاک فوج میں بھی کشمیریوں کی شمولیت آبادی کے تناسب سے کہیں زیادہ ہے۔

انہوں نے کہا کہ کشمیریوں نے پاکستان اور کشمیر کے دفاع کے لیے بے مثال قربانیاں دی ہیں، جبکہ معرکہ حق میں بھی کشمیری عوام اور پاک فوج پاکستان کے دفاع میں ایک ساتھ کھڑے رہے۔

مشیر وزیر اعظم کا کہنا تھا کہ تحریک آزادی جموں و کشمیر ہمارے لیے تحریک تکمیل پاکستان ہے، پاکستان کشمیر کے بغیر نامکمل ہے اور کشمیر پاکستان ہے، پاکستان اور کشمیر کے درمیان مضبوط رشتے کو دنیا کی کوئی طاقت کمزور نہیں کرسکتی، باغ اور پونچھ کے عوام کی جانب سے مسلم لیگ (ن) کے امیدواروں کی حمایت پاکستان اور کشمیر کے درمیان اسی مضبوط وابستگی کا ایک اور اظہار ہے۔

آزاد کشمیر کے انتخابی نتائج کا ذکر کرتے ہوئے رانا ثناء اللہ نے کہا کہ دو مراحل کے انتخابات کے بعد مسلم لیگ (ن) کی اسمبلی میں 24 منتخب ارکان کی پوزیشن ہے، جبکہ مخصوص نشستیں ملنے کے بعد پارٹی کی مجموعی تعداد 30 تک پہنچ جائے گی۔

انہوں نے کہا کہ دو تہائی اکثریت حاصل کرنے کے لیے مسلم لیگ (ن) کو مزید 6 ارکان درکار ہیں، 10 اگست کو باغ اور پونچھ ڈویژن سے مزید 4 مسلم لیگ (ن) کے ارکان منتخب ہوئے تو پارٹی دو تہائی اکثریت کے مزید قریب پہنچ جائے گی، جبکہ پونچھ ڈویژن کی باقی نشستوں پر ہونے والے انتخابات میں بھی مسلم لیگ (ن) کی کامیابی کی امید ہے۔

دوسری جانب وفاقی وزیر امور کشمیر انجینئر امیر مقام نے جلسے سے خطاب کرتے ہوئے کہا کہ حویلی کے بعد باغ میں عوام کی بڑی تعداد میں شرکت نے ثابت کردیا ہے کہ کشمیری عوام مسلم لیگ (ن) اور قائد نواز شریف کے ساتھ کھڑے ہیں، نواز شریف جلسے میں موجود نہیں، تاہم ان کے کارکنوں اور سپاہیوں نے ان کی غیر موجودگی میں بھی عوامی حمایت ثابت کردی ہے۔

امیر مقام کا پیپلز پارٹی کی جانب سے دھاندلی کے الزامات کو مسترد کرتے ہوئے کہنا تھا کہ آزاد کشمیر میں صدر اور وزیراعظم سمیت اہم حکومتی عہدے پیپلز پارٹی کے پاس رہے ہیں، اس لیے مسلم لیگ (ن) پر دھاندلی کا الزام سمجھ سے بالاتر ہے، کشمیری عوام نے پیپلز پارٹی کے انتخابی بیانیے کو مسترد کرکے مسلم لیگ (ن) کو حکومت سازی کا مینڈیٹ دیا ہے۔

انہوں نے کہا کہ نواز شریف، وزیراعظم شہباز شریف اور وزیراعلیٰ پنجاب مریم نواز کی کارکردگی اور کشمیری عوام کے ساتھ محبت نے بھی ووٹرز کے فیصلے پر اثر ڈالا، آزاد کشمیر میں مسلم لیگ (ن) کی حکومت بن چکی ہے اور باغ کے منتخب نمائندے بھی حکومت کا حصہ بنیں گے۔

The post جوائنٹ ایکشن کمیٹی کے ساتھ بیٹھ کر مسائل حل کریں گے: رانا ثناء اللہ appeared first on .

لاہور: پنجاب حکومت نے انتظامی سطح پر تبدیلیاں کر دیں، 46 افسران کے تقرر و تبادلے کر دیئے گئے۔

چیف سیکرٹری پنجاب زاہد اختر زمان کی منظوری سے نوٹیفکیشن جاری کر دیا گیا، تمام تبادلوں اور تقرریوں کا اطلاق فوری طور پر ہوگا۔

جاری کردہ نوٹیفکیشن کے مطابق امبرین چودھری کو اے ڈی سی انفورسمنٹ شیخوپورہ تعینات کردیا گیا، وقار عظیم کو اے ڈی سی انفورسمنٹ ننکانہ صاحب تعینات کردیا گیا، محمد کلیم کو اے ڈی سی انفورسمنٹ قصور لگا دیا گیا۔

ساریہ حیدر کو اے ڈی سی انفورسمنٹ اوکاڑہ، صولت حیات وٹو کو اے ڈی سی انفورسمنٹ سیالکوٹ تعینات کردیا گیا، خضر حیات کو اے ڈی سی انفورسمنٹ نارووال، عفت النسا کو اے ڈی سی انفورسمنٹ منڈی بہاؤالدین تعینات کیا گیا۔

بلاول علی کو اے ڈی سی انفورسمنٹ حافظ آباد، سارہ امجد کو اے ڈی سی انفورسمنٹ جہلم، انعم بابر کو اے ڈی سی انفورسمنٹ اٹک تعینات کردیا گیا، مریم بخت آور کو اے ڈی سی انفورسمنٹ چکوال تعینات کردیا گیا، زینب جہانداد کو اے ڈی سی انفورسمنٹ خوشاب لگا دیا گیا۔

محمد عمر فاروق کو اے ڈی سی انفورسمنٹ میانوالی تعینات کردیا گیا، حسن نذیر کو اے ڈی سی انفورسمنٹ بھکر، مجاہد عباس کو اے ڈی سی انفورسمنٹ ٹوبہ ٹیک سنگھ، محمد اویس کو اے ڈی سی انفورسمنٹ جھنگ تعینات کردیا گیا۔

مدثر عارف کو اے ڈی سی انفورسمنٹ خانیوال، محمد عثمان جلیس کو اے ڈی سی انفورسمنٹ وہاڑی، محمد سہیل اختر کو اے ڈی سی انفورسمنٹ پاکپتن، احمد فراز اعوان کو اے ڈی سی انفورسمنٹ لودھراں، محمد عرفان انور کو اے ڈی سی انفورسمنٹ مظفرگڑھ تعینات کردیا گیا۔

الوینہ فیض کو اے ڈی سی انفورسمنٹ لیہ، مبارک علی رضا کو اے ڈی سی انفورسمنٹ راجن پور، مہر غلام عباس کو اے ڈی سی انفورسمنٹ بہاولنگر، محمد اعتزاز انجم کو اے ڈی سی انفورسمنٹ رحیم یار خان تعینات کردیا گیا۔

محمد عابد شبیر کو اے ڈی سی انفورسمنٹ چنیوٹ، ملک رشاد نعمت کو اے ڈی سی انفورسمنٹ مری، صابر حسین کو اے ڈی سی انفورسمنٹ کوٹ ادو، عبدالرحمان خان کو اے ڈی سی انفورسمنٹ راولپنڈی لگا دیا گیا۔

ملیحہ سحر کو اے ڈی سی ہیڈ کوارٹرز راولپنڈی، جنید عالم کو اے ڈی سی میونسپل سروسز راولپنڈی، فہد اعجاز کو اے ڈی سی انفورسمنٹ گوجرانوالہ، زہرا نور کو اے ڈی سی انفورسمنٹ، رانا اورنگزیب کو اے ڈی سی میونسپل سروسز ساہیوال، انصر صغیر خان کو اے ڈی سی ہیڈ کوارٹرز گوجرانوالہ تعینات کردیا گیا۔

شبیر حسین کو اے ڈی سی سوشل سروسز ساہیوال، عدنان رشید کو اے ڈی سی انفورسمنٹ ساہیوال، نوید احمد کو اے ڈی سی انفورسمنٹ ڈیرہ غازی خان، محمد مرتضیٰ ملک کو اے ڈی سی انفورسمنٹ بہاولپور، محمد کامران افضل کو اے ڈی سی ہیڈکوارٹرز ملتان تعینات کیا گیا۔

محمد اعجاز کو اے ڈی سی ہیڈکوارٹرز ساہیوال، احمد رضا بٹ کو اے ڈی سی ہیڈکوارٹرز ڈیرہ غازی خان، عمران منیر کو اے ڈی سی ہیڈ کوارٹرز بہاولپور، توقیر احمد کو اے ڈی سی سوشل سروسز ڈیرہ غازی خان، محمد زبیر کو اے ڈی سی سوشل سروسز بہاولپور میں ذمہ داریاں سونپ دی گئیں۔

The post پنجاب ، 46 افسروں کے تقرر و تبادلے appeared first on .

حیدرآباد: تھانہ اے سیکشن کی حدود لطیف آباد یونٹ نمبر 11 میں ڈکیتی مزاحمت پر مسلح افراد کی فائرنگ سے 4 افراد زخمی ہوگئے۔
پولیس کے مطابق زخمیوں میں یونین کمیٹی 117 کے چئیرمین بھی شامل ہیں، زخمیوں کو طبی امداد کیلئے ہسپتال منتقل کر دیا گیا ہے، متاثرین میں سے 3 افراد کو گولیاں لگیں جبکہ ایک کو پسٹل کے بٹ سے زخمی کیا ہے۔

پولیس حکام نے مزید بتایا کہ دونوں ملزمان فائرنگ کرتے ہوے پیدل فرار ہوئے، دونوں ملزمان نے آگے جا کر 2 الگ، الگ موٹرسائیکلیں چھینی اور فرار ہو گئے۔

The post حیدرآباد: ڈکیتی مزاحمت پر مسلح افراد کی فائرنگ، 4 افراد زخمی appeared first on .

لاہور: پنجاب حکومت نے گندم کی ریلیز پرائس مقرر کر دی، پنجاب کابینہ کی منظوری کے بعد محکمہ فوڈ سیفٹی اینڈ کنزیومر پروٹیکشن نے گندم کی نئی ریلیز پرائس کا نوٹیفکیشن جاری کر دیا، جس کا اطلاق فوری طور پر ہوگا۔
نوٹیفکیشن کے مطابق پاسکو سے حاصل کردہ اور ایگریگیٹرز کے پاس موجود گندم کی قیمت 3 ہزار 800 روپے فی 40 کلوگرام مقرر کی گئی ہے۔

نوٹیفکیشن پنجاب فوڈ سٹفس (کنٹرول) ایکٹ 1958 کے تحت جاری کیا گیا ہے، تمام کمشنرز، ڈپٹی کمشنرز اور متعلقہ اداروں کو احکامات پر عملدرآمد یقینی بنانے کی ہدایت کی گئی ہے۔

محکمہ فوڈ سیفٹی اینڈ کنزیومر پروٹیکشن کے مطابق نوٹیفکیشن پاکستان فلور ملز ایسوسی ایشن سمیت تمام متعلقہ اداروں کو ارسال کر دیا گیا ہے۔

سیکرٹری فوڈ سیفٹی اینڈ کنزیومر پروٹیکشن ڈاکٹر کرن خورشید نے گندم کی ریلیز پرائس سے متعلق نوٹیفکیشن جاری کیا۔

The post پنجاب حکومت نے گندم کی ریلیز پرائس مقرر کر دی appeared first on .

اسلام آباد: حکومت نے پٹرولیم مصنوعات کی قیمتوں میں کمی کا اعلان کر دیا ہے۔

پٹرولیم ڈویژن کی جانب سے جاری کردہ نوٹیفکیشن کے مطابق ہائی سپیڈ ڈیزل کی قیمت میں 4 روپے 7 پیسے فی لٹر کمی کی گئی ہے، جس کے بعد ڈیزل کی نئی قیمت 385 روپے 86 پیسے فی لٹر مقرر کر دی گئی ہے۔

اسی طرح پٹرول کی قیمت میں 3 روپے 39 پیسے فی لٹر کمی کی گئی ہے، جس کے بعد پٹرول کی نئی قیمت 328 روپے 56 پیسے فی لٹر ہو گئی ہے۔

پیٹرولیم ڈویژن کے مطابق پیٹرول اور ڈیزل کی نئی قیمتوں کا تعین اوگرا کی جانب سے کیا گیا ہے جو آج رات 12 بجے سے کل رات 12 بجے تک نافذ العمل ہوگا۔

واضح رہے کہ گزشتہ روز حکومت کی جانب سے پٹرول کی قیمت میں 4 روپے 8 پیسے فی لٹر جبکہ ہائی سپیڈ ڈیزل کی قیمت میں 2 روپے 45 پیسے کی کمی کی گئی تھی۔

مزید برآں حکومت کی جانب سے یہ ریلیف عالمی منڈی میں تیل کی قیمتوں اور ملکی مالیاتی عوامل کو مدنظر رکھتے ہوئے دیا گیا ہے۔

The post پٹرول کی قیمت میں 3 روپے 39 پیسے فی لٹر کمی appeared first on .